Mipasalig ang National Union of People’s Lawyers nga palig-onon ug pangusgan sa International Criminal Court ang hurisdiksyon niini sa Pilipinas. Sumala kang NUPL President Atty. Ephraim Cortez, klaro ug lig-on ang basehan aron kumpirmahon sa ICC Pre-Trial Chamber ang hurisdiksyon sa korte sa nasod, bisan pa sa petisyon sa kampo ni kanhi Pangulong Rodrigo Duterte nga nagkuwestiyon niini.
Gipatin-aw usab ni Atty. Cortez nga ang mga giingong krimen nga nalambigit sa kaso nahitabo sa panahon nga sakop pa sa ICC ang Pilipinas, busa apil gihapon kini sa ilang pagdumala.
Subay sa iyang pahayag, nagsugod pa niadtong Pebrero 2018 ang preliminary investigation sa Office of the Prosecutor, nga mas una pa kaysa sa pag-epektibo sa pag-withdraw sa Pilipinas sa ICC niadtong 2019. Dugang pa niya, padayon ug konektado ang proseso sa imbestigasyon gikan sa preliminary examination hangtod sa full investigation aron mailhan ang posibleng responsable sa giingong crimes against humanity.
Sa kasamtangan, giingon ni Cortez nga ang pag-withdraw sa Pilipinas gihimo aron malikayan ang accountability sa miaging administrasyon, apan ulahi na kini ug wala nay epekto sa nagpadayon nga kaso sa ICC.
