Gisiguro sa Office of the Ombudsman nga hapit na nilang isampa ang kaso batok sa gitawag nga “master plunderers” sa giingong maanomalyang flood control projects.Sumala pa ni Assistant Ombudsman Atty. Mico Clavano, gipahigayon ang press briefing sa Office of the Ombudsman kalabot sa mga kaso nga giandam batok sa korapsyon, diin gipadayag nga hapit na ipasaka ngadto sa tukmang korte ang maong kaso.
Gibutyag sa Ombudsman spokesperson nga lakip sa gitumbok nga “master plunderers” mao ang duha ka kanhing lider sa Kongreso, usa ka former House Speaker ug usa ka former Senate President.Dugang pa niini, giingon nga dili lamang sila ang maapil sa kaso, kondili lakip usab ang pipila ka mga senador ug kongresista nga giimbestigahan kalabot sa maong kontrobersiya.
Sa kasamtangan, dugang pa ni Atty. Clavano nga wala pa nila gipadayag ang eksaktong petsa sa pagsampa sa kaso aron malikayan ang pagkompromiso sa proseso ug mapabilin ang integridad sa imbestigasyon. Subay sa una nang pahayag ni Ombudsman Jesus Crispin “Boying” Remulla, lakip sa posibleng kasuhan sa Office of the Ombudsman mao si former House Speaker Martin Romualdez ug former Senate President Chiz Escudero, nga giatubang og kasong plunder kalabot sa maong flood control anomalies.
Gidugang pa sa Ombudsman nga gilauman ang dugang pang mga kaso nga ipagawas sa mga sunod nga bulan isip kabahin sa padayon nga kampanya batok sa korapsyon sa gobyerno.
