Magsugod na sa sunod semana ang BALIKATAN Exercises tali sa Pilipinas ug United States uban ang 17 ka nasud nga kabahin sa international observer program.
Gibanabanaan nga moabot sa 17,000 ka mga sundalo ang moapil gikan sa lain-laing nasud sama sa Pilipinas, Amerika, Australia, Japan, New Zealand, Canada ug France.
Sumala kang AFP Education, Training and Doctrine Commander Major General Francisco Lorenzo Jr., kabahin kini sa modernisasyon dili lang sa kagamitan kundili lakip usab sa kahibalo ug taktika sa mga sundalo.
Palig-onon ang ilahang abilidad sa pag-atubang sa mga hagit sa kahanginan, kayutaan, kadagatan, ug lakip na ang cyber domain.
Alang kang U.S. Marine Corps I Marine Expeditionary Force Commander Lt. Gen. Christian Wortman, mapalig-on niini ang relasyon ug kooperasyon sa Pilipinas ug Amerika sa Indo-Pacific sulod sa kapin 75 ka tuig.
Gipaklaro sa AFP nga ang partisipasyon sa ubang nasud base sa Status of Visiting Forces Agreement (SOVFA) ug dili aron pugson ang bisan unsang nasud.
Nasayran nga wala pay ASEAN member states nga misulod sa maong kasabutan, apan abri kini nga mapalapdan alang sa usa ka malinawon ug lig-on nga rehiyon. Molungtad ang ehersisyo hangtod Mayo 8.
