Nagsanib-pwersa ang Department of Justice (DOJ), Presidential Communications Office (PCO), ug Department of Information and Communications Technology (DICT) sa paglunsad sa “Oplan Kontra Fake News” aron mapalig-on ang kampanya batok sa pagkalat sa sayop nga impormasyon sa nasud.
Subay sa programa, managhiusa nga gipirmahan sa mga kalihim sa maong mga ahensya ang usa ka kasabutan nga nagtumong sa pagpalig-on sa koordinasyon ug kooperasyon tali sa mga departamento aron mapadali ang pagresponde batok sa fake news.
Personal nga mitambong sa maong kalihukan sila Department of Justice Sec. Frederick Vida, Department of Information and Communications Technology Sec. Henry Rhoel Aguda, ug Presidential Communications Office Sec. Dave Gomez.
Sumala pa ni Sec. Vida, ang padayon nga pagkalat sa sayop nga impormasyon kinahanglan atubangon ug dili pasagdan kay kini makaguba sa pagsalig sa publiko, magdala og kagubot sa panahon sa krisis, ug makapahinabog panagbahin sa katawhan. Gipasiugda usab niya ang importansya sa “whole-of-government approach” aron mas epektibong malabanan ang problema sa fake news sa nasud.
Miuyon usab si Sec. Dave Gomez nga ang maong inisyatiba dili lamang pulong kondili konkretong aksyon aron mapanalipdan ang katungod sa mga katawhan sa sakto ug tinuod nga impormasyon, lakip ang katungod sa libre nga pagpahayag. Dugang pa niya, ang proyekto naghatag og proteksyon sa publiko aron masiguro nga makadawat sila og husto ug kasaligan nga impormasyon.
Sa kasamtangan, gipahayag ni DICT Sec. Henry Rhoel Aguda nga responsibilidad sa gobyerno ang pagpanubag ug pag-ila sa mga nagpaluyo ug nagpakaylap sa maling impormasyon aron mapanalipdan ang interes sa publiko ug mapalig-on ang integridad sa impormasyon sa nasud.
