Patay ang upat ka mga indibidwal human nga nabangga ang usa ka wing van nga truck sa Marilog Gym sa Brgy. Marilog Proper, ning dakbayan sa Davao kaganihang pasado alas Dyes sa buntag.
Subay sa report nakabsan sa kinabuhi ang drayber, iyang pasahero, ug duha (2) ka mga bystander nga patay diha-diha dayon.
Wala pa sila mailhi samtang nagpadayon pa ang beripikasyon sa ilang pagkatawo.
Tungod sa kakusog sa pagkabangga, nadanyos pag-ayo ang istruktura gym diin ang katunga nga bahin nahugno.
Nasayran nga ang wing Van adunay kargamento nga mga kinarton sa mga biskwet ug uban pang grocery items nga nagkatag sa kadalanan. Samtang ang wingvan, anaa na sa posisyon nga pagkahayang ug natanggal pa ang kaha niini samtang didto na kini nadasok sa kilid sa covered court.
Sumala pa sa mga residente sa wala pa kini nabangga sa covered court, adunay nakamatikod nga nibuto ang likod sa maong truck samtang kusog ang padagan hinungdan nga nawad-an og kontrol ang drayber.
Nasayran nga naatol ang disgrasya samtang nagkatapok sumala pa ang mga functionaries sa baranggay alang sa usa ka meeting nga kasagaran mga Brgy.Tanod.
Sa pagkakaron, nagpadayun usab ang imbistigasyon sa mga otoridad kabahin sa maong panghitabo samtang padayon usab nga gina-atiman ang mga naangol.
