Nagpalupad og flares ang mga pwersa sa China nga diretso ngadto sa usa ka eroplano sa maritime law enforcement sa Pilipinas ibabaw sa Spratly Islands kagahapong adlawa {Huwebes} sumala sa tigpamaba sa Philippine Coast Guard (PCG), ug giakusahan ang Beijing sa “klaro ug tinuyo nga pagpang-bully.”
Sa usa ka pahayag, gibutyag ni PCG Rear Admiral Jay Tarriela nga nahitabo ang insidente sa kontrolado sa China nga Mischief Reef ug Subi Reef nga lokal nga gitawag og Panganiban Reef ug Zamora Reef, samtang ang eroplano nga Cessna Caravan sa coastguard nagpatuman og maritime domain awareness flight ibabaw sa maong kapupud-an.
Sumala niya, nagpadala usab og radio transmissions ang mga pwersa sa China nga nagaangkon og “indisputable sovereignty” o dili malalis nga soberanya sa maong mga lugar.
Giangkon sa China ang hapit tibuok West Philippine Sea, lakip na ang tanang maritime features sa Spratly Islands, usa ka grupo nga adunay kapin sa 250 ka isla ug bahura nga nahimutang sa habagatang bahin sa kadagatan.
Ang Pilipinas nagaangkon sa amihanang-sidlakang bahin sa kapupud-an; samtang ang Brunei, Malaysia, ug Vietnam adunay nag-overlap usab nga mga pag-angkon.
Kahinumduman nga niadtong miaging bulan, si Pang. Ferdinand Marcos Jr. mipagawas og executive order nga nagmando sa pagdawat sa lokal nga mga ngalan alang sa 131 ka maritime features sa maong kapupud-an.
