Gikanayon sa Department of Energy (DOE) nga ang pag-amenda sa Oil Deregulation Law mao ang labing importante nga lakang nga angay buhaton sa Kongreso aron maprotektahan ang nasud batok sa kalit nga pagsaka sa presyo sa lana, ilabi na sa panahon sa krisis o giyera.
Sa House Committee on Ways and Means, gipangutana ni Rep. Alfredo Garbin Jr. si DOE Secretary Sharon Garin kung unsang mga emergency legislative amendments ang ilahang girekomenda aron masulbad ang padayon nga pagsaka sa presyo sa petrolyo.
Lakip usab sa gipangutana, kung pabor ba ang ahensya sa inventory disclosure, anti-profiteering measures, o temporaryong pagsuspenso sa excise tax ug VAT adjustment sa diesel.
Apan ang tubag sa DOE, bisan epektibo ang kasamtangang balaod sa normal nga sitwasyon, dili kini igo kung adunay global nga tensyon ug natural o artificial nga hinungdan sa pagsaka sa presyo.
Giangkon sa kalihim nga dali kaayo maapektuhan ang Pilipinas sa global nga pagsaka sa presyo.
Dugang pa ni Garin nga wala silay igong gahum ubos sa kasamtangang balaod aron pugngan ang pagsaka sa presyo sa dili pa kini mahitabo.
Gawas sa pag-amenda sa balaod, gisuportahan usab sa ahensya ang polisiya sa unbundling ug pagpalapad sa ilang gahum sa industriya. Samtang, gibutyag usab nga anaa sa 20 porsyento sa pump price sa gasolina naggikan sa excise tax.
