Giawhag ni Sen.Jinggoy Ejercito Estrada ang Department of Foreign Affairs (DFA) nga magduso og diplomatic protest batok sa padayon nga presensya ug mga aksyon sa China sa West Philippine Sea, samtang nagkagrabe ang tensyon sa Middle East.
Sumala kang Estrada, dili angay nga pahimuslan sa China ang kahimtang nga naka-focus ang kalibutan sa krisis sa Middle East aron palapdan ang ilahang presensya sa giangkon nga teritoryo.
Sumala pa niini, nabutang dinhi dili lamang ang soberanya sa Pilipinas kundili lakip ang seguridad sa enerhiya sa nasud.
Gibutyag usab sa senador nga klaro ang katungod sa Pilipinas sa WPS subay sa desisyon sa arbitral tribunal ug ubos sa United Nations Convention on the Law of the Sea (UNCLOS).
Busa, kinahanglan nga magpabiling lig-on ang nasud sa pagpanalipod sa iyahang teritoryo ug mga abot sa kadagatan.
Kauban niini, nanawagan ang nahisgutang opisyal sa Armed Forces of the Philippines nga palig-onon pa ang maritime patrols sa maong lugar.
Samtang gitaho usab niini ang pagdako sa presensya sa mga Chinese vessels sa WPS samtang nagpadayon ang negosasyon sa Manila ug Beijing kabahin sa posibleng joint exploration.
