Gitimbaya ni Governor Raul Mabanglo ang mga estudyante nga migradwar karong panahuna sa ilahang probinsya uban sa malipayong panghinaot nga nakab-ot niini ang kalampusan sa ilahang kaugalingon.
Subay sa opisyal nga giguwang pamahayag sa probinsya sa Davao De Oro, nanghinaot kini ngadto sa mga migradwar alang sa kaayuhan sa laing lebel nga puno sa mas dako nga responsibilidad ug mga hagit nga importante sa akademikong pagtubo.
Gipaambit usab ni Mabanglo nga kaniadtong estudyante pa kini kung unsa nakahatag sa dakong bili sa edukasyon.
Labaw pa kini sa pagkat-on ug kini usab ang bahin sa kinabuhi diin makaila og mga tawo nga sa sinugdan estranghero apan sa ulahi mahimong mga higala ug pamilya.
Nagpahinumdom usab kini sa mga migradwar nga ang graduation dili lamang selebrasyon sa academic achievement, apan usa usab ka pamatuod sa bunga sa paningkamot ug sa walay kondisyon nga gugma, kakugi, ug mga sakripisyo sa sa mga ginikanan. Kini nga milestone mao pa lamang ang sinugdanan sa mas dagkong oportunidad nga nagpaabot sa mga nahisgutan.
Gitambagan usab niini ang mga estudyante nga bisan unsa man ang atubangon sa umaabot nga panahon, ang Provincial Government sa Davao de Oro magpadayon sa paghatag og taas nga bili sa edukasyon ug walay hunong nga mosuporta sa mga magtutudlo, estudyante, ug sa tanang nagpaluyo sa mga institusyon sa pagkat-on sa probinsya.
Gipanghinaot niini nga ang mga bag-ong migradwar mao ang paglaum sa ugma, ug nagpasabot kini nga sila ang mahimong instrumento sa pagpadayon nga kalamboan.
