Gibutyag sa Catholic Bishops’ Conference of the Philippines nga walay pulos ang pangumpisal ug pangayo og pasaylo sa mga kurap nga opisyal karong Semana Santa kung dili nila ibalik ang kwarta nga ilahang gikawat sa panudlanan sa gobyerno.
Sa interbyu sa Bombo Radyo Philippines kang Fr. Vladimir Echalas, iyahang gibutyag nga ang tinuod nga paghinulsol nagkinahanglan og klarong aksyon.
Matod sa pari, importante ang “integral reconciliation” ug “retribution” aron mahimong tinuod ug kompleto ang pagbag-o sa mga nalambigit sa korapsyon.
Gawas sa isyu sa korapsyon, gihagit usab niini ang media ug ang publiko nga motindog alang sa kamatuoran batok sa pagkatag sa fake news, misinformation, ug disinformation.
Iyahang gipaklaro nga ang komunikasyon angay nga gamiton aron matul-id ang mga bakak nga gipakaylap sa bayarang trolls, ug iyahang gipahinumduman ang mga mamamahayag sa ilahang responsibilidad sa paghatag og tinuod nga impormasyon.
Gitambagan usab niini ang publiko nga mosalig lamang sa mga lehitimo ug mainstream nga sources sa balita.
