Nitambong si VP Sara Duterte-Carpio sa usa ka misa sa San Pedro Cathedral kaganihang udto alang kang kanhing Pangulong Rodrigo Duterte.
Gawas sa Bise Presidente, mitambong usab ang daghang mga supporter aron mag-ampo nga makagawas ang kanhi pangulo ug makabalik sa nasod ilabi na dinhi sa dakbayan sa Davao.
Gipahigayon ang santos nga misa alang sa unang anibersaryo sa pagdakop ug pagdala kang FPRRD sa International Criminal Court sa The Hague tungod sa kasong crimes against humanity.
Gipanguluhan usab ang misa ni Arsobispo Romulo Valles uban usab ang mga kapari-an kaganihang udto.
Sa gipaguwang pamahayag ni VP Sara, gibutyag niini nga human sa usa ka tuig nga pagdakop sa kanhi pangulo ang maong panghitabo usa ka pagsulay sa demokrasya ug sa mga prinsipyo sa due process ug rule of law.
Matud pa sa Bise Presidente, ang nahitabo nga gitawag niing extraordinary rendition o kidnapping kang kanhi Pangulong Duterte usa ka seryosong pahimangno nga ang balaod dili angay gamiton isip armas alang sa politika o personal nga interes.
Dugang pa niya nga ang anibersaryo usa ka panawagan sa tanan nga magpabiling mabinantayon.
Una nang gibutyag sa Davao City Police Office nga adunay gipakatag nga kapin gatos nga ihap sa kapulisan alang sa maong kalihukan aron masiguro ang kaluwasa sa mga nanambong sa maong misa.
