Gipahibalo sa Philippine Atmospheric, Geophysical and Astronomical Services Administration (PAGASA) nga natapos na ang La Niña phenomenon.
Sumala sa PAGASA, mibalik na sa ENSO-neutral ang kahimtang sa dagat sa Pacific Ocean.
Ang maong kondisyon gilauman nga magpadayon hangtod sa tunga-tunga nga bahin sa tuig 2026.
Dugang pa sa ahensya nga bisan pa og wala na ang La Niña, makasinati gihapon ang nasud og mga pag-ulan tungod sa lain-laing weather ug climate systems, nga mahimong hinungdan sa flash floods ug landslides sa ubang mga lugar.
Busa, gitambagan sa PAGASA ang publiko nga magpabiling alerto ug mabinantayon aron malikayan ang grabeng epekto sa panahon.
Una nang gipahayag sa PAGASA nga gilauman nga mokabat sa upat hangtod 11 ka bagyo ang mosulod sa Philippine Area of Responsibility (PAR) gikan Pebrero hangtod Hunyo 2026.
