Milapas na sa $100 matag bariles kon drum ang presyo sa krudo sa unang higayon sulod sa kapin tulo ug tunga ka tuig.
Kini mitumaw taliwala sa epekto sa nagpadayon nga gubat nga naglambigit sa Iran, nga nakaapekto sa produksyon ug pagpadala sa lana sa rehiyon sa Middle East.
Sa labing bag-ong datos, ang presyo sa Brent Crude, nga gigamit isip international benchmark sa presyo sa lana, miabot na sa $107.97 matag bariles human mibalik ang market trading sa Chicago Mercantile Exchange.
Nisaka kini og 16.5% kung itandi sa presyo niadtong Biyernes nga niabot sa $92.69 sa pagsirado sa merkado.
Gilauman nga mahimo pa kining mosaka o mokunhod samtang nagpadayon ang trading sa global oil market.
Kahinumduman nga ang ulahing higayon nga milapas sa $100 matag bariles ang presyo sa krudo sa United States mao pa niadtong Hunyo 30, 2022, sa dihang miabot kini sa $105.76.
Samtang sa Brent crude, ulahi kining nahitabo niadtong Hulyo 29, 2022, diin misaka sa $104 matag drum ang presyo.
Sukad sa paglusad sa joint attack sa Israel ug United States batok sa Iran, naapektuhan ang financial markets, ug mitumaw ang kabalaka nga posible pang mosaka ang inflation tungod sa mas mahal nga energy costs.
Adunay kahadlok usab nga mahimong mokunhod ang spending sa mga konsyumer sa US, nga giila nga usa sa mga nag-unang nagpalihok sa ekonomiya sa kalibutan.
