Nag-isyu og show cause order ang Department of Energy (DOE) batok sa 54 ka gasolinahan tungod sa giingong pagsaka sa presyo sa ilang mga produktong petrolyo, taliwala kini sa epekto sa nagpadayon nga kagubot sa Middle East.
Gikumpirma kini ni Palace Officer Claire Castro, ngadto sa mga media personnel nga kauban sa work visit ni Pang.Ferdinand Marcos Jr. sa United States.
Nagpasidaan usab ang opisyal sa Malacañang sa mga negosyanteng nagpahimulos sa kasamtangang sitwasyon, nga matud pa adunay legal nga padulngan ang ilahang ginabuhat ug posible silang kasohan ug matangtangan og lisensya sa pagnegosyo.
Samtang sa bahin sa DOE, gipadayag ni Sharon Garin, Secretary sa ahensya, nga pasakaan og kaso ang maong 54 ka gasolinahan tungod sa giingong paglapas.
Gipunting sa DOE ang mga gasolinahan nga giingong naga-hoard, nga matud pa sa opisyal nakapahimulos ug nakadaot kini sa katawhan. Sumala sa kalihim, kasuhan ang mga responsable ug ipasiradao sa DOE ang maong mga establisyimento.
