Misalmot ang kapin sa 7,000 hangtod 8,000 ka tawo sa Purple Walk kaganihang buntag sa Rizal Park sa Davao City.
Sumala sa Integrated Gender and Development Office, gisugdan ang kalihukan sa alas 7 sa buntag pinaagi sa pagbaktas gikan sa Roxas Avenue padulong sa Rizal Park, kabahin sa selebrasyon sa International Women’s Month.
Gitambungan kini sa mga kababaihan nga gikan sa nagkadaiyang sektor sa syudad, uniformed personnel, mga trabahante sa gobyerno, ug mga lider sa barangay, nga halos tanan nagsul-ob og purple nga t-shirt.
Ang tema sa selebrasyon karong tuiga mao ang “WE for Gender Equality and Inclusive Society”, uban ang sub-theme nga “Lead like the Babaylans, Filipinas.”
Mapasigarbohon usab ang Police Regional Office 11 sa ilang partisipasyon sa International Women’s Day Parade sa Rizal Park, Bolton Street, Poblacion District, diin gipasidunggan ang kusog, resiliency, ug bililhon nga kontribusyon sa matag babaye sa ilang pwersa ug komunidad.
Subay sa 2026 Women’s Month Celebration, gipangunahan ni PRO 11 Regional Director PBGEN Leon Victor Z. Rosete, pinaagi sa representasyon ni PBGEN Mariano C. Rodriguez, ang Kick-off Ceremony sa PRO 11 Pulis Bagani Hall, Camp Sgt. Quintin M. Merecido, Buhangin.
Lakip sa mga kalihokan ang komprehensibo nga health ug wellness fair nga nagtanyag og libre nga dental ug medical check-ups, optical check-ups uban sa libre nga reading glasses, ug uban pang vital services alang sa PRO 11 personnel.
Pinaagi sa panag-uban, gipaningkamotan sa PRO 11 ang paghimo og mas lig-on, himsog, ug inklusibong komunidad.
Sa nakalabay nga adlaw, gipasidunggan usab ang Top 3 Outstanding City/Provincial Police Offices nga adunay Gender-Responsive Impact Projects: Davao City Police Office (DCPO), Davao del Norte Police Provincial Office (DNPPO), ug Davao de Oro Police Provincial Office (DDOPPO).
Atol sa selebrasyon, nagpamatuod kini sa komitment sa PRO 11 sa paghimo og inklusibong palibot diin ang matag babaye empowered sa pagpanguna uban ang kaalam, kaisog, ug kalooy, sama sa espiritu sa modernong Babaylan.
