Gikumpirma sa National Security Council (NSC) nga adunay tulo ka mga kanhing opisyal sa gobyerno ang nakahatag sumala pa og pipila ka sensitibong impormasyon ngadto sa China.
Sumala kang NSC Spokesperson Cornelio Valencia Jr., natumbok sa konseho ang giingong pagpadala sa datos ngadto sa Chinese government pinaagi sa LinkedIn ug ubang messaging apps.
Gipaklaro ni Valencia nga ang tulo ka Pilipino nakakuha sa maong impormasyon sa lain-laing paagi: Usa ka kanhing assistant sa Department of National Defense ug ang Usa ka kanhing researcher sa Philippine Navy.
Nasayran nga ang Usa niini adunay koneksyon sa usa ka opisyal sa Philippine Coast Guard, nga adunay access usab sa pipila ka sensitibong datos.
Lakip sa mga nabutyag nga impormasyon ang detalye kabahin sa military engagement ug personnel, lakip na ang rotation ug resupply missions sa Ayungin Shoal ug BRP Sierra Madre, nga nagsilbi nga outpost sa Armed Forces of the Philippines sa West Philippine Sea.
Gisiguro usab ni Valencia nga hugot nga gimonitor sa NSC ang maong isyu sa pagpangispiya sa nasod, ilabi na ang paggamit sa ubang nasod sa mga Pilipino ingon nga mga ahente.
Gidugang pa niini nga padayon ang koordinasyon sa NSC uban sa ubang ahensya sa gobyerno aron mapugngan ang bisan unsang hulga sa nasudnong seguridad.
Ang maong insidente nagdugang sa nagasaka nga kabalaka kabahin sa espionage activities sa rehiyon, dungan sa nagkagrabe nga tensyon sa West Philippine Sea.
