Giklaro sa Davao Light and Power Company (DLPC) nga dili maapektuhan ang ilahang serbisyo sa kuryente sa nagpadayon nga tensyon sa Middle East.
Sa ekslusibong pakighinabi sa Bombo Radyo Davao kang Fermin Edillon, Head sa DLPC Reputation Enhancement, gikanayon niini nga walay direktang epekto sa suplay sa kuryente sa Davao ang kagubot sa tungang sidlakan.
Apan, dili sumala pa ikalimod nga ang gubot sa international level mahimong makaapekto sa ekonomiya, lakip na sa presyo sa fuel sa world market nga mahimong motaas ang generation charge, VAT, ug uban pang components nga kabahin sa electricity rate kada kilowatt-hour (kWh).
Mahimo usab kini makaapekto sa transportasyon ug sa kinatibuk-ang presyo sa mga palaliton. Samtang, gipahibalo ni Edillon nga opisyal nang nagsugod og operasyon ang DLPC sa Island Garden City of Samal (IGACOS) niadtong Pebrero 25, 2026, human maturn-over ang writ of possession ug assets gikan sa NORDECO.
Gipaningkamotan sa DLPC nga makahatag og 24/7 nga suplay sa kuryente sa isla, apan giandam ang publiko sa posibleng panagsang brownout tungod kay ang ubang linya kay karaan pa ug gikan pa sa miaging operator.
Dugang pa, nagpadayon ang DLPC sa pagpanglimpyo sa mga “spaghetti wires” ubos sa Anti-Spaghetti Wire Ordinance sa dakbayan.
Giayo na usab ang pipila ka faulty wirings isip kabahin sa pagpaayo sa safety ug reliability nga serbisyo. Gipasalig sa kompanya nga magpadayon ang ilahang pagmonitor sa kahimtang sa enerhiya ug merkado aron maprotektahan ang interes sa mga konsumidor.
