Gikumpirma sa kagamhanan nga nadakpan ang pipila ka Filipino nationals tungod sa suspetsang pagpaniid alang sa China, nga gitawag nga usa ka “seryosong isyu sa national security.”
Sumala sa National Security Council (NSC), natapos na ang operasyon sa mga indibidwal nga giingong naglihok ubos sa mando sa Chinese intelligence.
Bisan pa man wala naghatag og eksaktong ihap o detalye kung adunay naduso nga kaso, gikanayon sa NSC nga ang mga nadakpan misugot sa ilahang partisipasyon sa espionage activities ug nakig-kooperar na sa mga awtoridad.
Tanang nadakpan nga mga Pilipino sumala sa pipila ka security sources, dili ubos sa tulo ka indibidwal ang nalakip. Usa sa mga akusado mibutyag nga una kining gitanyagan sa usa ka kaila nga Filipina nga magsulat og opinion articles tugbang sa bayad samtang siya usa ka pa junior staffer sa Department of National Defense.
Hangtod nga misalmot na usab kini sa paghatag og impormasyon kabahin sa West Philippine Sea ug sa depensa nga relasyon sa nasod, lakip ang pakiglambigit sa United States.
Aminado ang suspetsado nga wala dayon niya nasabtan nga alang sa interes sa China ang iyahang gibuhat, ug naglisod siya sa pag-undang tungod sa panginahanglanon sa kuwarta.
Gisugdan niya ang maong aktibidad gikan 2023 hangtod 2025, taliwala sa nagkadako nga tensyon sa West Philippine Sea tali sa Pilipinas ug China.
