Nagpasidaan ang Philippine Exporters Confederation Inc. (Philexport) nga posible kini magdala og dako nga epekto sa global supply chain tungod sa nagkagrabe nga tensyon sa Middle East, human sa pag-atake sa Estados Unidos ug Israel sa Iran ug sa panimalos nga gihimo sa Iran.
Sa usa ka pahayag, gibutyag sa grupo nga ang mga pag-atake ug pag-target sa mga nasud sa Middle East nga adunay military base sa US ug ang pagpahugot sa Strait of Hormuz nga nakahatag na og pagka-delay sa airspace ug mga logistics, samtang nagpalala sa kalihukan sa energy markets.
Sumala sa grupo, ang hinay nga pagtubo sa ekonomiya ug mas taas nga gasto posibleng makaapekto sa dagan sa negosyo sa tibuok kalibutan.
Alang sa Pilipinas, nga daghan og gi-import nga lana, ang pagsaka sa presyo sa krudo direkta nga mopataas sa gasto sa produksyon, transportasyon, ug logistics.
Sumala sa Philexport, posible kini makapahuyang sa price competitiveness sa mga produktong Pilipino sa global nga merkado.
Apil sa mga sektor nga labing apektado mao ang electronics, garments, processed food, ug furniture, nga posibleng maf-atubang sa mas taas nga shipping rates, insurance premiums, ug mas taas nga transit time kon mausab o ma-delay ang mga ruta.
Gibalik usab sa grupo ang mga nangaging tensyon sa rehiyon nga nagresulta sa freight ug security surcharges, mga dugang-singil nga posible usab ipahamtang pag-usab ug magpabug-at sa pagnegosyo ug turismo.
