Patay ang usa ka retiradong pulis nga adunay dala nga pistola ug granada human nga mipakita og pagsukol sa miresponding kapulisan.
Sumala sa Blotter report sa kapulisan sa Island Garden City of Samal Police Station, usa ka concerned citizen ang mitawag sa PNP Hotline aron i-report ang insidente.
Sumala pa usa ka insidente sa pagpamusil nga nahitabo pasado alas 8:00 sa gabii niadtong Pebrero 26, 2026 sa Purok Ipil-Ipil-A, Barangay San Remigio, Kaputian District, Island Garden City of Samal (IGACOS), Davao del Norte.
Nailhan ang suspek nga si Edwin Malinao, 54-anyos, usa ka retiradong pulis.
Subay sa inisyal nga imbestigasyon, nasuta nga ang suspek miadto sa balay sa biktima nga armado og pistola. Nahitabo sumala pa ang panaglalis nga misangpot sa pagpamusil sa suspek sa biktima, nga naigo sa tuo nga paa.
Atol sa pagresponde sa kapulisan, giseguro pag-ayo niini ang lugar ug misulay og malinawon nga negosasyon aron mapaklama ang sitwasyon.
Apan bisan paman niini, nagpabilin sumala pa nga agresibo ang suspek, nagpadayon sa pagpabuto sa iyang armas, ug nanghulga sa mga pulis ug sibilyan samtang nagkupot og hand grenade samtang natangtang na ang safety pin.
Sumala pa sa kapulisan nga tungod sa klarong hulga sa kinabuhi ug kaluwasan sa publiko, ang responding team napugos sa paglihok isip lehitimong depensa diin nahitabo ang komprontasyon human nga misulay matud pa ang suspek nga mopabuto batok sa mga pulis apan na-neutralize kini.
Atol sa maong panghitabo nahulog sumala pa ang hand grenade ug mibuto, nga miresulta og dugang kadaot sa suspek.
Gidala gilayon ang biktima sa Davao del Norte Hospital – IGACOS Zone apan gi-refer kini sa Southern Philippines Medical Center alang sa dugang nga pag-atiman.
Sumala pa sa mga otoridad ang suspek nagpakita pa og timailhan sa kinabuhi human sa maong panghitabo apan gideklarar kini nga Dead on Arrival mga alas 12:11 sa kaadlawon niadtong Pebrero 27, 2026.
Narekober sa crime scene ang usa ka caliber .45 nga pistola nga adunay magazine nga puno og live ammunition, tulo ka fired cartridge cases, ug fragments sa hand grenade lakip ang lever ug fuse components.
