Mibuhos ang pahasubo sa pagpanaw sa award-winning nga singer nga si Neil Sedaka nga namatay sa edad nga 86-anyos.
Gikumpirma sa pamilya ang kalit nga pagpanaw sa ilang minahal nga bana, amahan, ug lolo, nga giila nga usa ka tinuod nga legend sa rock and roll.
Si Sedaka nailhan sa iyang mala-boyish nga tingog nga nakapaila kaniya sa unang bahin sa rock ‘n’ roll.
Pipila sa iyang ilado nga mga kanta mao ang “Breaking Up Is Hard to Do”, “Laughter in the Rain”, ug “Calendar Girl”.
Nagbaton usab siya og duha ka dekada nga kasikat, una niadtong 1960s ug misunod pag-usab niadtong 1970s, nga nagpamatood sa iyang kahanas isip mang-aawit ug manunulat sa kanta.
Sumala sa pahayag sa pamilya, si Sedaka dili lamang usa ka inspirasyon sa milyon-milyong fans apan usa usab ka talagsaon nga tawo nga dako ang nahatag nga kontribyusyon sa musika ilabi na sa mga nakaila kaniya personal.
Wala pa’y gipagawas nga detalye kabahin sa hinungdan sa iyang kamatayon ang iyahang pamilya.
