Nagpahigayon na og hiniusang pag-atake ang militar sa United States ug Israel batok sa Iran, nga nagpasamot karon sa tensiyon sa Middle East.
Atol sa pagpangatake, nadunggan ang mga kusog nga pagbusikad sa Tehran ug uban pang mga siyudad sa Iran kaganihang buntag.
Gikumpirma usa ni US Pres. Donald Trump nga nagsugod na ang Estados Unidos og “major combat operations” batok sa Iran.
Matud niya, ang maong aksyon usa ka tubag sa giingong hulga gikan sa gobyerno sa Iran, ilabi na may kalabotan sa nuclear ug missile programs niini.
Samtang sumala usab sa gobyerno sa Israel, ang ilang bahin sa operasyon usa ka pre-emptive strike aron mapugngan ang posibleng hulga sa ilang nasudnong seguridad.
Nagdeklara usab ang Israel og state of emergency samtang nag-andam na sa posibleng pagpanimalos sa Iran.
Gisirado na usab ang airspace sa Iran samtang padayon pa ang mga pagbuto sa nagkalain-laing lugar.
Gumikan niini, nagkadako karon ang kabalaka sa internasyonal nga komunidad nga mahimong mosangpot kini sa mas lapad nga gubat sa rehiyon, ilabi na kon mosukol o mobalos ang Iran batok sa pwersa sa U.S. ug Israel o sa ilang mga kaalyado.
Sa pagkakaron, wala pa’y klaro ang dakong kadaot ug gidaghanon sa mga biktima, samtang padayon pa ang pagmonitor sa kahimtang sa maong sitwasyon karong panahuna.
