Gibarugan sa abogado ni kanhi Pangulong Rodrigo Duterte nga si Atty. Nicholas Kaufman, nga walay partikular nga direktiba gikan sa kanhi Presidente aron patyon ang mga drug suspect sa kampanya niini batok sa iligal nga droga.
Gipaguwa ni Kaufman ang maong pahayag sa padayon nga confirmation of charges hearing batok sa kanhi Presidente nga nag-atubang sa kaso nga crimes against humanity tungod sa mga pagpatay sa anti-drug campaign sa panahon nga siya pa ang mayor sa Davao City ug Presidente sa Pilipinas.
Sumala kang Kaufman, walay smoking gun kon lig-on nga ebidensya sa kaso ug walay bisan usa ka testigo nga nag-ingon nga nakadawat og direktang sugo gikan kang Duterte nga mogawas ug mupatay sa mga drug personalities.
Gibatikos usab ni Kaufman ang alegasyon sa prosekyusyon nga daw gihimo ni Duterte ang pag-atake sa tibuok populasyon sa Pilipinas subay sa polisiya aron mapatay ang mga tawo nga gituhuan nga nalambigit sa krimen.
