Gisuspinde karong adlawa ang mga klase ug trabaho tungod sa nadawat nga hulga sa pagpamomba sa Brokenshire College Inc.
Subay sa gipaguwa nga abiso sa maong tulunghaan, ilaha kining gipatuman alang sa kaluwasan sa tanan, nga bisan kini seryoso o joke man, ginatubag kini sa pamunuan sa maong tulunghaan nga usa ka seryoso nga panghitabo.
Gipahigayon usab ang clearing operations uban sa tabang sa Philippine National Police (PNP), sa Local Government Unit, ug sa College Security Team.
Ala 1:26 karong hapon, gi-report sa Security Team nga human sa hugot nga inspeksyon sa mga pasilidad nga gihimo sa PNP Bomb Squad, nga walay nakita nga hulga.
Gipahibalo usab niini nga luwas na ang campus.
Gipahibalo usab niini nga alang ugmang adlawa, Pebrero 27, 2026, ang mga klase sa tanan nga lebel pagahimoon online ug synchronous.
Ang mga faculty members dili na kinahanglan nga moadto sa campus ug mahimong magtrabaho na lamang gikan sa balay.
Bisan paman niini, magsugod pag-usab ang operasyon sa opisina ug kinahanglan ang tanan nga non-teaching staff mo-report sa eskwelahan.
Samtang sa laing bahin, daling gi-respondehan usab sa mga kapulisan, EOD teams, ug K9 units ang Ateneo de Davao University–Jacinto Campus human nakadawat usab og bomb threat nga anaa sumala pa sa library, kagahapon adlaw nga Miyerkoles.
Human sa gipahigayon nga inspeksyon, nakaplagan ang duha ka unattended nga bag, apan pagkasusi, nahimutang lamang ang mga gamit pang-eskwela ug walay eksplosibo nga nakit-an ug gi-deklarang cleared ang lugar sa alas 6:50 sa kagabii.
Sa pagka karon, padayon ang imbestigasyon sa Sta. Ana Police Station aron masuta ang nagpadala sa threat. Sumala pa kapulisan, nadawat sa opisyal nga email sa unibersidad ang maong hulga alas-5:42 sa hapon.
