Gilauman nga moabot sa unom hangtod 14 ka mga bagyo ang mosulod sa Philippine Area of Responsibility gikan Marso hangtod Agosto, dungan sa gilaumang paghinay sa La Niña karong nagkaduol na ang ting-init.
Sumala sa Philippine Atmospheric, Geophysical and Astronomical Services Administration (PAGASA), padayon pang nasinati-an karon ang epekto sa La Niña apan nagpaingon na ang nasod ngadto sa ENSO-neutral nga kondisyon.
Sa ika-193 nga Climate Forum, gipaklaro ni Climate Monitoring and Prediction Section chief Dr. Joseph Basconcillo nga nagpabilin pa gihapon ang La Niña sa tropical Pacific.
Ang ENSO-neutral nagtumong sa kahimtang nga walay naglungtad nga La Niña o El Niño.
Sa dili pa mobalik sa normal ang pag-ulan tungod sa southwest monsoon o habagat pagsugod sa Hunyo, makasinati una ang dakong bahin sa Luzon og mas daghang mga adlaw nga uga o walay ulan.
Gibanabana usab nga mosaka ang temperatura sa nasod. Nagpasidaan ang ahensya nga posibleng moabot ang kainit sa Metro Manila hangtod 37.5°C sa bulan sa Abril, samtang mahimo kining mosaka hangtod 39.9°C sa Northern Luzon.
Giawhag sa ahensya ang publiko nga magpadayon sa pagmonitor sa ilahang mga advisories samtang nag-usab-usab ang kahimtang sa panahon.
