Usa ka estudyante sa Nagoya, Japan ang nakaangkon og bag-ong world record human siya nakagama sa labing gamay nga humanoid robot sa tibuok kalibutan.
Gikumpirma sa records keeping organization nga Guinness World Records nga si Mitsuya Tatsuhiko ang bag-ong record holder sa titulo nga “Smallest Humanoid Robot.”
Nahimo kini human niini nga mabuo ang humanoid robot nga adunay gitas-on nga 2.27 inches, nga pwede makumpara sa kadako sa usa ka ATM card.
Si Tatsuhiko usa ka postgraduate student sa Nagoya Institute of Technology, diin nagtuon siya og robotics.
Bisan bata pa lamang siya, hilig na niini ang robotics ug sa edad nga 10-anyos, nakagama na kini og simpleng robot nga makalihok ang mga kamot ug tiil.
Karon, ang iyahang focus mao ang paghimo og gagmay nga robot nga makatabang sa panahon sa kalamidad sama sa linog.
Gitinguha niini nga makagama og robot nga makasulod sa apiki nga lugar sama sa mga naguba nga building o huot nga langob.
