Pipila ka mga eskwelahan sa nagkalain-laing bahin sa nasud ang nagsuspinde sa ilahang klase karong adlawa, isip paghandum sa ika-40 nga anibersaryo sa EDSA People Power Revolution.
Nagpagawas og anunsyo niadtong Lunes ang mga eskwelahan nga nahimutang sa daplin sa EDSA–Ortigas Avenue (EDSOR), diin ilahang gipahibalo ang pagsuspinde sa klase ug giawhag ang mga estudyante, magtutudlo, ug kawani nga motambong sa usa ka pilgrimage sa EDSA Shrine.
Una nang gideklara sa Malacañang Palace ang Pebrero 25 isip working holiday, lahi sa nangaging mga administrasyon nga naghimo niini nga special non-working holiday atol sa selebrasyon.
Samtang kabahin usab niini, si Pang.Ferdinand Marcos Jr. abri sa mga sugyot nga himuong national holiday matag Pebrero baynte singko aron hatagan og higayon ang mga Pilipino sa paghandum sa EDSA People Power Revolution.
Sumala sa Palace press officer nga si Claire Castro, andam ang Presidente sa pagtuon sa gisugyot nga balaod nga magdeklara sa Pebrero 25 isip regular national holiday, aron pasidunggan ang 1986 nga dili madugoon nga pag-alsa nga nagpukan sa diktadurya sa iyahang amahan nga si Ferdinand Marcos Sr.
