Gikanayon sa Philippine Navy nga dili miyembro sa Philippine Marine Corps (PMC) ang upat sa 18 ka mga indibidwal nga gipresenta kagahapong adlawa nga sumala pa mga bagmen nga naghatod og maleta nga P805 billion nga kickbacks alang matud pa kang Pang. Ferdinand Marcos Jr., ug kanhing House Speaker Martin Romualdez nga gikan sumala pa kang Congressman Zaldy Co.
Sa usa ka pahayag, gipasabot ni Navy spokesperson Captain Marissa Arlene Martinez nga base sa ilang opisyal nga rekord, wala gayud nahimong miyembro sa Philippine Navy o PMC ang upat ka indibidwal nga gipaila-ila sa usa ka press conference nga gipangulohan ni Levito Baligod.
Samtang kadaghanan kanila gi-“discharged dishonorably,” ang uban nagretiro uban sa “good standing.”
Gihimo ang maong pahayag sa Navy human masusi ang pagkatao ug serbisyo sa mga indibidwal. Mahitungod kang Orly Guteza, gipunting ni Capt. Martinez nga nagretiro na kini gikan sa serbisyo sukad pa niadtong Hunyo 2020 ug dili na kini ilawom sa hurisdiksyon sa Philippine Navy.
Gipahimangnuan usab sa Navy ang publiko nga susihon una ang kredibilidad ug pagkamatuod sa impormasyon nga madawat, lakip ang source ug platform, aron malikayan ang pagpakatag sa sayop nga impormasyon.
Sa laing bahin, gibarugan sa Navy nga magpabilin silang propesyonal, disiplinado, ug non-partisan nga organisasyon nga dili ikompromiso ang integridad ug reputasyon, ug magpadayon sa ilang mandato sa pagdepensa sa soberaniya sa nasud ug pag-alagad sa mga Pilipino.
Sa bahin sa Armed Forces of the Philippines (AFP), gibutyag ni Col. Xerxers Trinidad, Public Affairs Office Chief, nga ang mga pahayag sa maong public forum kinahanglan nga susihon pinaagi sa husto nga legal ug proseso.
