Gipagawas ni International Criminal Court (ICC) Senior Trial Lawyer nga si Julian Nicholls ang mga giingong kauban o co-perpetrators sa mga alegasyong pagpamatay atol sa panahon nga mayor pa sa Davao City si kanhi Pangulong Rodrigo Duterte.
Sa unang adlaw sa confirmation of charges, gipakita ang papel ni Sen. Ronald dela Rosa nga kaniadto nagsilbing hepe sa Davao City Police Office.
Samtang si Sen.Christopher Go nahimong special assistant ug adviser ni Duterte niadtong panahona.
Gipanganlan usab sa pagdyngog si kanhi Davao police chief Vicente Danao, kanhi National Bureau of Investigation (NBI) Davao Regional Director Dante Gierran, ug si Atty. Vitaliano Aguirre II.
Sa Document Containing the Charges (DCC) nga gisumite sa prosecution ug gipagawas sa ICC sa miaging mga semana, gipanganlan sila Go, Dela Rosa, Danao, Gierran ug Aguirre isip mga co-perpetrators sa giingong pagplano aron ma-neutralize ang mga kriminal pinaagi sa pagpatay kanila.
Lakip usab sa dokumento nga gipangalanan isip co-perpetrators sila kanhi PNP chief Oscar Albayalde ug Isidro Lapena.
Sumala pa kang Nicholls, adunay sistema nga gisunod kaniadto si Duterte nga maoy hinungdan sa pagkamugna sa Davao Death Squad (DDS).
Ang papel, matud pa niya, sa mga co-perpetrators mao ang pagpaabot sa mga sugo gikan kang Duterte aron ipatuman ang mga pagpamatay, diin ang mga miyembro kuno naglakip sa mga kapulisan ug mga hitmen nga maoy nagpatuman sa operasyon.
Sa ikaduhang adlaw sa pagdungog, isa-isahon sa mga prosecutor sa ICC ang pipila ka detalye kabahin sa mga giingong kauban ni Duterte sa pagpatuman sa iyahang war on drugs.
