Gibuhian na gikan sa kustodiya sa kapulisan, Huwebes sa gabii ang manghod nga igsoon ni King Charles nga si Andrew Mountbatten-Windsor human kini nadakpan tungod sa gidudahan nga misconduct in public office nga adunay kalabutan sa alegasyon nga nagpadala sumala pa siya og kompidensyal nga mga dokumento sa gobyerno ngadto kang Jeffrey Epstein.
Si Mountbatten-Windsor nga nagsaulog sa iyahang adalw nga natawhan nga nag-edad og 66 atol sa pagkasikop niini, giimbestigahan tibuok adlaw sa mga otoridad sa Thames Valley Police. Niadtong unanb bahin ning bulana, gikananayon kapulisan nga ilahang gisusi ang alegasyon nga nagpasa sumala pa kini og mga dokumento ngadto sa namatay ( Epstien) nga nahukman nga sex offender samtang nagserbisyo siya isip trade envoy.
Gumikan sa maong panghitabo, ang pagdakop sa igsuon ni King Charles, nga ikawalo sa linya sa trono, usa ka talagsaong hitabo sa modernong panahon.
Matod pa ni King Charles sa usa ka pahayag, nakabalo sumala pa kini sa balita mahitungod kang Andrew Mountbatten-Windsor (Prince Andrew) ug ang suspetsa sa misconduct in public office.
Subay sa taho, nakita si Prince Andrew nga migawas sa estasyon sa kapulisan sa Aylsham, sidlakang bahin sa England, diin gisugat siya sa pipila ka mga photographer ug television crews, alas-7 pasado sa gabii.
Samtang gikumpirma usab sa Thames Valley Police nga adunay nadakpang lalaki nga ilaha ra usab nga gibuhian nga gipailawom sa imbestigasyon apan wala niini gipanganlan ang kanhing prinsipe.
Bisan wala pahibaloa ang Buckingham Palace mahitungod sa pagdakop,gibutyag ni King Charles nga ang mga awtoridad adunay bug-os ug kinasingkasing nga suporta ug kooperasyon gikan sa ilahang pamilya. Nasayran nga mibisita ang hari sa usa ka fashion show sa London kagahapong adlawa (Huwebes) apan wala na maghatag pa og dugang komento.
Nasayran nga si Mountbatten-Windsor, ikaduhang anak sa mipanaw nga si Queen Elizabeth, nga una nang milimod sa bisan unsang kasaypanan nga adunay kalabutan kang Epstein ug gibutyag niini nga nagbasol kini sa ilahang panaghigalaay.
Sa pagkakaron, wala motubag ang iyahang opisina sa hangyo sa pagkomento ug wala pa kini magpadayag sa publiko sukad sa pagpagawas sa kapin sa 3 milyon ka mga panid sa dokumento sa gobyerno sa U.S. may kalabutan kang Epstein, nga nahukman niadtong 2008 tungod sa pag-recruit og menor de edad alang sa prostitusyon.
Sumala sa mga files, gipakita nga niadtong 2010 nagpasa si Mountbatten-Windsor kang Epstein og mga report mahitungod sa Vietnam, Singapore ug uban pang mga lugar nga iyahang gibisitahan sa opisyal nga mga biyahe isip Special Representative for Trade and Investment sa gobyerno.
Kahinumduman nga si Andrew napugos sa pagbiya sa maong posisyon niadtong 2011 human sa pagbutyag sa iyahang suod nga koneksyon kang Epstein.
