Mangonsulta sa publiko ang Land Transportation Franchising and Regulatory Board (LTFRB) kabahin sa gihangyo nga pagsaka sa pamasahe sugod sa mosunod nga semana.
Kini gumikan sa sunod-sunod nga mga semana sa pagsaka sa presyo sa mga produktong petrolyo.
Sumala sa ahensiya, ang padayon nga pagtaas sa presyo sa lana ug sa gasto sa maintenance sa mga sakyanan maoy nakapadasig sa mga grupo sa transportasyon nga mosumite sa ilahang petisyon alang sa umento sa minimum fare.
Sa usa ka pahayag, gibutayag ni Vigor Mendoza III, chairperson sa LTFRB, nga magpahigayon sila og duha ka pagdungog sa mosunod nga semana aron hisgutan ang tanang isyu nga may kalabotan sa mga gihangyo nga fare hike.
Subay sa mga petisyon, nangayo ang mga transport group og dugang nga P2 sa minimum fare og himoon nga P15 ang minimum fare alang sa traditional jeepneys ug P15 hangtod P17 alang sa modern jeepneys.
Matod pa sa ahensiya, gihangyo usab sa mga grupo nga himoon nang permanente ang P1 provisional increase nga gipatuman niadtong 2023.
Gusto usab sa mga petitioner nga madugangan ang bayad sa matag mosunod nga kilometro human sa 4-kilometer nga sakop sa minimum fare.
