Gibatikos sa mga human rights advocates ang giingong delaying tactic sa kampo ni kanhi Presidente Rodrigo Duterte aron mapahunong ang pagpadayon sa iyahang kaso sa International Criminal Court (ICC).
Sa usa ka pahayag, gipadayag sa Duterte Panagutin Network nga nakabase sa Europa nga dili na bag-o alang kanila ang mga politiko nga mogamit sa problema sa kahimsog aron malikayan ang pag-atubang sa pagtaral ug pagkabilanggo.
Dugang pa sa grupo, nakahukom na ang ICC nga “fit” ang kanhi Presidente aron moatubang sa pre-trial proceedings.
Ang pagkuwestiyon sa kampo ni Duterte sa maong desisyon, sumala pa nila, usa na usab ka bag-ong taktika aron mas dugang pang mapalangan ang nalangay nga proseso sa hustisya.
Gihimo sa grupo ang maong pahayag human sa pagsumite sa duha ka mga bag-ong apela sa international tribunal sa lead counsel ni Duterte nga si Nicholas Kaufman.
Lakip niini ang apela batok sa desisyon sa ICC Pre-Trial Chamber I nga nagdeklara nga fit ang kanhi Presidente sa pagtambong sa pre-trial proceedings, ingon man ang apela sa desisyon sa pre-trial judges nga nagmandato sa padayon nga pagkabilanggo sa kanhi Presidente.
