Patay ang usa ka 36-anyos nga lalaki human gidunggab sa iyang bayaw sa Barangay Buda, Marilog District, Davao City, kagabii, Pebrero 1, 2026.
Giila ang biktima nga si alyas Ritchie, miyembro sa CAFGU ug residente sa maong lugar, samtang ang suspek mao si alyas Christian, 33-anyos, bayaw sa biktima.
Sumala sa inisyal nga imbestigasyon sa kapulisan, nag-inom ang mga mahisgutan sulod sa balay sa suspek alas 10:40 sa gabii sa susamang adlaw dihang kalit nga nahitabo ang mainiton nga panaglalis.
Tungod sa panagbikil migawas sumala pa ang biktima ug gigukod kini sa suspek nga naghupot na og kitchen knife.
Gidunggab ang biktima sa makadaghang higayon nga hinungdan sa iyang hinanaling kamatayon.
Human sa insidente, midagan ang suspek paingon sa Barangay Salumay.
Apan pinaagi sa hot pursuit operation nga gipangulohan sa Police Station 12, malampusong nadakpan ang suspek.
Sa pagkakaron, anaa na sa kustodiya sa kapulisan ang suspek alang sa pagpasaka og angay nga kaso batok kaniya.
