Wala na’y plano nga ilisan sumala pa ang legal team ni kanhing Pang. Rodrigo Duterte. Kini ang gibutyag ni VP Sara atol sa iyahang pagbisita sa iyahang amahan sa pasilidad sa ICC sa The Hague, Netherlands apan aduna sumala pa’y gihatag nga giya alang sa iyahang team.
Samtang gikanayon usab sa bise presidente nga suporta ug pag-ampo ang gikinahanglan sa kaso sa kanhing Pangulo.
Nagpasalamat usab kini sa suporta nga padayon nga ginahatag ngadto sa iyahang amahan.
Samtang sa laing bahin, gipamugos sa lead legal counsel ni kanhing Pang.Duterte nga si Atty. Nicholas Kaufman, nga adunay kakulangan ang Pre-Trial Chamber human kuno wala niini gikonsidera ang medical report nga gisumite sa iyahang kampo.
Sumala kang Kaufman, ang maong report naggikan sa mga neurologist ug neuropsychologist nga misusi sa kahimtang ni Duterte, apan wala sumala pa kini tagda sa Pre-Trial Chamber.
Tungod niini, matod pa niya, wala gayud matarong og tuon ang kahimtang sa kanhi pangulo, ilabi na ang may kalabotan sa iyang kahimsog. Tungod sa maong mga desisyon, mipadayun si Kaufman sa paghangyo alang sa “immediate interim release” ni Duterte.
Kahinumduman nga una nang gibutyag sa ICC Pre Trial Chamber 1 nga adunay kapasidad pa ang kanhing Pangulo nga moatubang sa mga hearing gumikan sa iyahang mga kaso.
Una nang gibutyag usab sa ICC nga karong Pebrero 23-27 ang Confirmation of charges sa kanhi Pangulo sa Courtroom 1 sa international tribunal.
