Gibutyag sa lokal nga grupo sa mga konsumidor sa Davao Region nga nagpabilin gihapon nga taas ang residential power rate sa Northern Davao Electric Cooperative (NORDECO) sa listahan sa mga power utilities sa rehiyon.
Subay sa gipaguwa nga datos sa Davao Consumer Movement, adunay P14.90/kWh ang singil sa NORDECO alang sa bulan sa Enero 2026, nga gikan sa P12.70/kWh nga rate niadtong Disyembre 2025.
Samtang ang Davao Light and Power Company (DLPC), adunay pagsaka sa residential power rate nga P2, gikan sa P9.71 ug karon anaa na sa P11.72.
Naangkon usab ang pagsaka sa DORECO nga presyo sa residential power ngadto sa P12.89 per kwh.
Samtang pabilin nga adunay labing barato nga kuryente ang Davao del Sur Electric Cooperative (DASURECO) nga anaa lamang sa P10.3915/kWh ang ilahang singil.
Gipasabot usab sa ,maong grupo nga ang mga rate gibase sa publikong impormasyon nga makita online nga gipost sa mga power distributor.
Apan ang mga rate sa NORDECO gibase sa aktuwal nga electric bills nga nakolekta sa field, tungod kay ang electric cooperative wala nagpatik online sa ilahang mga rate.
Una usab nga nagpaklaro ang pipila sa mga power distributor nga adunay pagsaka sa presyo sa kuryente karong panahuna nga gikan sa Wholesale Electricity Spot Market (WESM) tungod sumala pa kini sa pagkaputol sa suplay sa kuryente sa pipila ka mga power plant sa nakalabay nga mga bulan.
