Mokabat sa 92 ka mga kanhing rebelde nga gikan sa mga nabungkag nga Guerrilla Fronts, Pulang Bagani Commands, Regional Headquarters, ug Sub-Regional Committees ilawom sa Southern Mindanao Regional Committee (SMRC) pormal nga mibalik sa sabakan sa balaod niadtong 27 Enero 2026 atol sa Mass Surrender ug Presentation nga gipahigayon sa Balimba Hills Activity Center, Sitio JBL, Brgy. Sto. Niño, Talaingod, Davao del Norte.
Ang maong kalihokan gipahigayon pinaagi sa hiniusang paningkamot sa 60th Infantry Battalion sa 10th Infantry (Agila) Division, mga opisyal sa lokal nga panggamhanan, ug uban pang mga stakeholder.
Lakip sa mga mitambong mao sila Bae Pilar Libayao, Chairman sa Indigenous Political Structure; Hon. Junnie Libayao, Municipal Mayor sa Talaingod; ug Hon. Edwin Jubahib, Gobernador sa Davao del Norte, uban ang mga representante gikan sa nagkalain-laing ahensiya sa gobyerno.
Atol sa turnover, gitugyan sa mga kanhi rebelde ang baynte nuebe (29) ka nagkalain-laing low-powered firearms alang sa hustong disposisyon ug nakadawat sila og food packs ug pinansyal nga tabang gikan sa mga lokal nga yunit sa pangagamhanan aron suportahan ang ilahang unang lakang sa pagbalik ug pag-integrate sa komunidad.
Pormal usab nga gipresentar ni Brigadier General Christopher Diaz, Commander sa 1003rd Infantry Brigade, ang 92 ka mga kanhing rebelde, ug giila ang ilahang boluntaryong pagbalik sa sabakan sa balaod ingon man ang pagsugod sa usa ka bag-ong bahin sa kalinaw ug panaghiusa alang sa ilahang kaugalingon, ilahang mga pamilya, ug ilahang mga komunidad.
Gibutyag usab ni Major General Alvin Luzon, Commander sa 10th Infantry (Agila) Division, nga ang maong kalihokan dili lamang usa ka surrender, kondili usa ka hiniusang pagpanumpa sa malungtarong kalinaw ug kalamboan.
Ang mga kanhi rebelde boluntaryong misurender human niining gipili ang dalan sa kalinaw, panaghiusa, ug pakig-uli, tungod sa ilahang tinguha nga makab-ot ang mas luwas nga kaugmaon ug mas maayong panginabuhi alang sa ilahang mga pamilya ug komunidad.
Ang malampusong mass surrender resulta sa padayon ug koordinadong paningkamot sa 10th Infantry (Agila) Division, mga lokal nga yunit sa pangagamhanan, ug mga key stakeholder, ug nagpamatuod sa padayon nga paningkamot sa Division sa pagmintinar sa mga insurgency-free nga komunidad dinhi sa rehiyon.
