Nakaplagan pa og laing patay’ng lawas sa kadagatan ang hiniusang search and retrieval teams nga nagpadayon sa pagpangita sa mga biktima sa pagkaunlod sa motorbanca MBCA Amejara, hinungdan nga misaka na sa unom ang kumpirmadong narekober nga mga lawas.
Sumala sa Office of Civil Defense–Davao Region (OCD-11), ang pinakabag-ong lawas narekober niadtong hapon sa Enero 25, 2026 sa bahin sa dagat duol sa Vic Waters, sa South-Southwest nga direksyon, mga 43 nautical miles gikan sa Buca Point sa Maasim, Sarangani Province. Ang lokasyon nagpakita nga padayon nang nagkatag ang mga biktima tungod sa kusog nga balod ug hangin sa maong rehiyon.
Human marekober, gisakay ang lawas sa barko sa Philippine Coast Guard nga BRP Panglao ug gitumong dal-on sa Balut Island, Davao Occidental. Didto ipahigayon ang hustong proseso lakip ang beripikasyon, documentation, ug pag-andam alang sa tukmang pag-ila sa identidad sa biktima.
Matod pa sa OCD-11, ang unang lima ka lawas nga narekober sa miaging mga adlaw nakit-an sulod sa Philippine Exclusive Economic Zone (EEZ) sa Southeastern Mindanao, nga nagpasabot sa lapad nga sakop sa search area nga ginakab-ot sa mga rescuers.
Padayon gihapon ang operasyon sa pagpangita sa ubang mga missing persons, uban ang koordinasyon sa Philippine Coast Guard, Armed Forces of the Philippines, local disaster units, ug uban pang ahensya. Gipaabot sa mga otoridad nga magpadayon ang retrieval operations samtang anaa pa’y kahayag ug lig-on nga kahimtang sa panahon, samtang naghulat usab ang publiko sa dugang opisyal nga updates sa kahimtang sa insidente.
