Nagplano ang kanhing Senador nga si Antonio Trillanes IV nga pasakahan ug ethics complaint si Senador Ronald “Bato” Dela Rosa kon dili pa kini magpakita.
Kapin duha na ka bulan nga wala nagpakita ang maong Senador human sa mga balita nga aduna sumala pa’y arrest warrant batok kaniya gikan sa International Criminal Court (ICC) tungod sa iyang papel sa gipatuman nga war on drugs.
Human sa pahayag ni Trillanes, mibutyag si Senate President Vicente Sotto III nga gawasnon ang bisan kinsang concerned citizen sa pagpasaka ug reklamo batok sa bisan kinsang Senador.
Matod pa niya, iproseso sa Senado ang maong reklamo subay sa ilahang mga balaod ug mga sumbanan.
Sa higayon nga ma-refer na kini sa hustong paagi, ang Chairman sa Ethics Committee maoy maghatag ug update ngadto sa publiko.
Samtang, gipatin-aw sa Chairman sa Ethics Committee nga si Senador JV Ejercito nga kon magpasaka si Trillanes ug reklamo, kinahanglan pa kini nga magpaabot tungod kay adunay mga naunang ethics complaint nga pending pa sa komite.
Dugang pa niya, wala pa usab mamugna pag-ayo ang komite tungod sa kasamtangang naka-break ang Senado.
Sa mensahe nga gipahibalo ni Senador Dela Rosa atol sa iyahang ika-64 nga adlaw nga natawhan niadtong Miyerkules, iyahang gibutyag nga maghulat siya sa hustong panahon aron atubangon, isip usa ka Pilipino, ang bisan unsang kaso kon tinuod man nga adunay mga kasong gipasaka batok kaniya.
