Miresulta sa bug-at nga trapiko ug pagdagsa sa mga turista ang simpleng hangyo sa social media sa usa ka 20-anyos nga babaye sa Chongqing, China human siya nangayo og tabang aron ipaihaw ang duha ka mga baboy alang sa tradisyonal nga handaan sa ilahang gamay nga baryo.
Nag-post si Daidai sa Douyin (Chinese TikTok) sa nakalabay nga semana aron mangayo og boluntaryo nga motabang, tungod kay tigulang na ang iyang amahan ug dili na kaya mag-ihaw sa baboy.
Tugbang niiini, nisaad siya og libre nga kumbira alang sa tanan nga moadto sa ilahang balay.
Sa sulod lamang sa usa ka adlaw, ang post nakadawat og kapin sa usa ka milyon ka likes ug nagdani og liboan ka mga tawo gikan sa lain-laing bahin sa China.
Tungod sa kadaghan nga nangadto, nahitabo ang bug-at nga trapiko sa dalan paingon sa ilahang baryo, ug daghan napugos nga maglakaw na lamang og layo.
Tungod kay kulang ang duha ka baboy alang sa kadaghan sa tawo, nag-donate og dugang baboy ang lokal nga gobyerno, samtang ang gagmay nga kumbira nag-andam og outdoor seating aron mapakaon ang tanan.
Ang aktwal nga pag-ihaw ug paag-andam sa mga pagkaon ang gi-livestream, nga nakaabot og kapin sa 100,000 online viewers ug 20 milyon ka likes.
Sa duha ka adlaw nga selebrasyon, misaka sa 2,000 ang gidaghanon sa mga nakakaon.
Matod ni Daidai, wala niya damha nga daghan kaayo ang modayo sa ilahang lugar. Nagpasalamat siya sa publiko, lokal nga opisyal, ug pulis sa pagdumala sa kalit nga pagdagsa.
Nalipay usab pag-ayo ang amahan ni Daidai sa resulta, ug giingon niini nga karon lamang nila nasinati-an ang ingon niini ka dako nga panagtigum sa ilahang baryo.
