Giduso karong adlawa sa Office of the Ombudsman ni kanhi Senador Antonio Trillanes IV ug pipila ka miyembro sa civil society organization nga The Silent Majority ang bag-ong reklamo nga plunder ug graft batok kang Vice President Sara Duterte.
Alas 10:00 sa buntag giduso sa kanhi senador kauban ang maong grupo sa Ombudsman ang mga reklamo batok sa bise presidente.
Sumala kang Jocelyn Marie Acosta, ang plunder ug graft cases nga giduso karon adunay kalabotan sa inisyal nga reklamo nga gisang-at niadtong Disyembre sa miaging tuig may kalabotan sa isyu sa confidential funds.
Matod pa niya, nagtuo sila nga daghan sumala pang balaod ang nalapas ni Vice President Sara Duterte, busa ilang tumong nga dili na kini palabyon ug patubagon sa giingong mga binuhatan.
Kabahin niini, gipadayag sa mga complainant ang mga alegasyon sa mga reklamo nga ilang gisang-at batok sa bise presidente.
Lakip niini ang plunder ug malversation complaints may kalabotan sa giingong anomalosong P650 milyon nga Confidential Funds sa Office of the Vice President ug Department of Education.
Giduso usab ang plunder ug malversation complaints may kalabotan sa gibanabanaan nga P2.7 bilyon nga anomalya sa Confidential Funds sa Davao City sa panahon nga Mayor pa si Vice President Sara Duterte.
Gawas pa niini, nagsang-at usab sila og ubang patung-patong nga reklamo batok sa maong opisyal may kalabotan sa giingong dili husto o sayop nga paggamit sa pondo sa katawhan.
