Mall sa Pakistan nasunog, 6 patay

Patay ang unom ka mga tawo ug 20 ang nasamdan human sa sunog nga nahitabo sa usa ka shopping mall sa Karachi, Pakistan.

Ang insidente nahitabo niadtong gabii sa Sabado sa Gul Plaza shopping mall, ug milungtad sa kapin sa 10 ka oras ang mga bombero aron kontrolon ang kalayo.

Sumala kang South Deputy Inspector General Syed Asad Raza, ang mall adunay 1,200 ka mga tindahan, ug adunay pipila ka bahin sa gusali nga nahugno tungod sa sunog.

Subay sa inisyal nga imbestigasyon sa mga otoridad, ang sunog nagsugod sa usa ka short circuit sa linya sa kuryente.

Padayon ang imbestigasyon sa mga otoridad samtang ang mga nasamdan nga biktima gipatambalan sa ospital.