Mipaklaro si Atty. Gabriel Villareal, lead counsel ug tigpamaaba ni Charlie “Atong” Ang, nga temporaryo siyang dili moatubang sa media aron dili maapektuhan ang mga legal nga lakang nga ilahang gipadayon alang sa iyahang kliyente.
Sumala kang Villareal, opisyal nga pahayag na lamang gikan sa iyang opisina ang ilahang ipagawas kon adunay angay nga i-update mahitungod sa kaso.
Iyahang gipadayag usab nga karong adlawa magsumite ang depensa ni Ang og Omnibus Motion aron wad-an og bisa ang warrant of arrest nga giisyu sa korte sa Laguna, may kalabotan sa pagkahanaw sa mga sabungero.
Nagalaum ang kampo ni Ang nga dali rang magtakda og pagdungog ang korte sa ilahang mosyon sa mosunod nga semana.
Gibutyag ni Villareal nga gipadali ang pagpagawas sa arrest order ug nilapas kini sa katungod sa iyang kliyente, tungod kay kulang ang impormasyong nga gihatag sa Department of Justice (DOJ).
Gipasabot usab sa abogado nga okupado siya sa pag-andam sa mga importanteng legal nga dokumento, mao nga dili pa siya makatubag gilayon sa mga pangutana.
Bisan pa niini, gipasiguro ni Villareal nga ginahatagan nila og bili ang paningkamot nga madungog ang bahin ni Ang, ug andam siyang mohatag og interview sa higayon nga matubag na ang mga panginahanglan sa iyang kliyente.
