Giawhag ni Senate President Pro Tempore Panfilo Lacson ang publiko nga bantayan kung giunsa paggasto sa executive branch sa P6.7 trilyones nga nasudnong badyet sa 2026.
Sumala kang Lacson, dili angay nga mahuman ang pampublikong pagbantay sa panahon sa pag-aproba ug pagpirma sa balaod, kondili kinahanglan kini ipadayon sa aktuwal nga implementasyon.
Gihisgutan niya nga ang parehas nga vigilance o pagmatngon nga gipakita sa Simbahan, mga relihiyosong grupo, ug civil society organizations atol sa bicameral debates angay ipadayon aron masiguro ang hustong paggasto sa kwarta sa mga taxpayers.
Gipahinumduman ni Lacson nga ang 2026 budget mahimong sukdanan kung aduna bay tinuod nga reporma sa gobyerno, ug kinahanglan usab tun-an ang mga miaging kaso sa korapsyon sa nangagi nga mga badyet.
Lakip sa mga ipatuman sa Senado ang general ug special provisions isip safety nets, lakip ang pagdili sa guarantee letters ug political patronage sa libreng medical assistance.
Kinahanglan usab nga ipatuman ang Medical Assistance ubos sa Universal Health Care law.
Kini ang labing dako nga badyet sa kasaysayan sa nasud, nga gitumong sa pagpondo sa mga dagkong programa sa imprastruktura, edukasyon, ug serbisyong pangkatilingban.
Bisan paman niini, pipila ka mga magbabalaod ang nagpahayag og kabalaka sa giingong “pork barrel” nga anaa sa unprogrammed appropriations.
Apan gipasalig sa liderato sa Kongreso nga mas abri ang proseso karong tuiga tungod sa live-streaming sa bicameral deliberations.
Ang pas-pas nga ratipikasyon nagpakita sa tinguha sa lehislatura nga masiguro ang padayon ug walay hunong nga operasyon sa gobyerno sa pagsugod sa 2026.
