Gisita sa mga kapulisan ang usa ka lalaki nga nagpaila nga tag-iya sa kalibutan human nga gibabagan niini ang karsada sa usa ka baranggay sa Manay davao Oriental.
Subay sa report sa kapulisan, giila ang usa ka lalaki nga si Datu Watawat, nga naila usab isip Senior Rubin Hari, uban ang iyahang mga kaubanan sa grupo nga mihimo ug barikada sa Barangay San Ignacio, Manay, Davao Oriental kagahapon sa buntag.
Sa gihimong pagpanubay sa mga otoridad sa maong dapit human nga nakadawat sila ug reklamo sa mga motorista ug mga katawhan, giangkon sa grupo nga sila kuno ang tag-iya sa kalibutan hinungdan nga nangolekta sila og bayad gikan sa gobyerno ug sa mga tawo nga moagi sa lugar.
Gumikan sa ilahang gihimong pagbabag, natanggong ang mga sakyanan sa karsada gumikan sa ilahang pagbarikada.
Sa karon nagpadayon pa ang pagminitor ug gihimong imbestigasyon sa kapulisan kabahin sa ilahang claim ingon man ang grupo nga ilahang gipaila.
Samtang wala pay gipaguwa nga pahayag ang mga otoridad kung pasakahan ba kini og kaso sa ilahang gihimo.
