Gipalig-on sa Korte Suprema ang hukom sa pagkabilanggo batok sa tulo ka pulis nga nalambigit sa pagpatay kang Kian Loyd delos Santos niadtong 2017 sa Caloocan City.
Sa desisyon sa Second Division nga gisulat ni Associate Justice Jhosep Lopez, gibasura ang apela nila Arnel Oares, Jeremias Pereda, ug Jerwin Cruz ug gikumpirma ang silot nga murder.
Ang tulo ka pulis gi-sentensiyahan og reclusion perpetua o hangtod 40 ka tuig nga pagkabilanggo ug gimaduan nga magbayad og ₱275,000 nga danyos sa pamilya sa biktima.
Subay sa ebidensya, giharangan si Kian, gipugos nga magdala og armas, ug sa ulahi gipusil samtang naglingkod o nagluhod, nga nagpamatuod nga wala siyay kapasidad sa pagdepensa sa iyang kaugalingon.
Gipahayag sa Korte Suprema nga adunay treachery sa krimen tungod kay gituyo nga gibutang sa mga akusado si Kian sa posisyon nga dili makabarog o makapanalipod sa iyang kaugalingon sa wala pa siya patya.
Sa una, gihukman na sa Caloocan RTC ug Court of Appeals ang tulo ka pulis niadtong 2018, ug karon gipalig-on sa SC ang desisyon.
Ang kaso ni Kian nagpabilin nga simbolo sa kontrobersyal nga war on drugs ug usa sa talagsaong higayon nga nasilotan ang mga pulis sa kaso sa extrajudicial killing.
