Mahimong ipagawas bisan unsang orasa ang warrant of arrest batok sa negosyanteng si Charlie “Atong” Ang, nga giingong utok sa likod sa misteryosong pagkahanaw sa mga sabungero.
Kini ang gibutyag ni Department of the Interior and Local Government (DILG) Secretary Jonvic Remulla kagahapong adlawa.
Kahinumduman nga kaniadto, nakumpirma sa Department of Justice (DOJ) nga nakakita kini og prima facie evidence nga adunay reasonable certainty of conviction aron kasuhan si Ang sa duha ka kaso sa kidnapping.
Gibutyag usab sa legal counsel ni Ang, si Atty. Gabriel Villareal, base sa ilang giduso nga motion for reconsideration, nga supak ang findings sa DOJ sa ebidensiya nga gipresenta sa prosecution panel.
Gibasura sa DOJ ang reklamo batok sa uban pang gisang-at sa whistleblower nga si Julie Patidongan nga giingong nalambigit sa pagkawala sa mga sabungero, lakip na ang aktres nga si Gretchen Barretto ug 10 pa ka respondents.
