Napili si Miss Philippines Chelsea Fernandez nga first runner-up sa Miss Cosmo 2025 Grand Finale & Beauty Music Festival sa Ho Chi Minh City, Vietnam, samtang si Miss USA Yolina Lindquist gikoronahan nga Miss Cosmo 2025.
Gawas pa niini, nakuha usab ni Fernandez ang Cosmo People’s Choice Award, nga nakakuha og kapin sa 28.3 milyones ka online votes.
Nakadani siya sa publiko sa coronation night pinaagi sa iyang bejeweled evening gown nga adunay sheer cape.
Sa question-and-answer portion, gipangutana siya kabahin sa mindset nga gusto niyang usbon kabahin sa kababayen-an.
Sumala pa niya nga ang mga babaye natural nga mga lider, apan kasagaran gikumpronta sa kakulango sa oportunidad ug lugar aron molambo sa kaugalingon.
Sa final showdown batok sa Miss Cosmo USA, gibutyag ni Fernandez ang iyang advocacy alang sa proteksyon sa mangroves sa Pilipinas.
Gisugdan niya ang iyang adbokasiya niadtong 2019 ug mibisita sa lain-laing siyudad ug probinsya aron magtanom og mangroves ug propagules.
Ang Miss Cosmo nahimong international pageant sa 2024, nga nag-rebrand isip Miss Cosmo Vietnam human sa pagbulag gikan sa Miss Universe franchise sa Vietnam.
Sa miaging tuig, si Miss Universe Philippines 2025 Ahtisa Manalo mi-representar sa Pilipinas sa Miss Cosmo ug nakahuman sa Top 10 sa inaugural competition sa 2024.
