Nagpagawas na og arrest order ang Regional Trial Court (RTC) Branch 27 sa Lapu-Lapu City batok sa pipila ka mga engineers nga may kalabutan sa usa ka concrete revetment project sa Barangay Culaman, Jose Abad Santos, Davao Occidental.
Gipagawas ang mga warrant human gibalhin ang kaso gikan sa RTC Malita, Davao Occidental.
Sumala sa pahayag sa ilang legal counsel, ang mga akusado gilayong gibutang sa kustodiya sa mga awtoridad.
Dugang pa sa ilang abogado, boluntaryo nang misurender sa National Bureau of Investigation (NBI) ang mga akusado pipila ka adlaw sa wala pa ipagawas ang warrant, isip pagpakita sa ilang pagtahod sa proseso sa balaod.
Ang kaso nagsugod sa alegasyon nga ang maong revetment project usa ka “ghost project.”
Apan kusganong gikalimod sa depensa ang maong akusasyon ug giingon nga ang proyekto tinuod nga naglungtad, nahuman na, ug karon nagserbisyo na sa publiko.
Matod pa sa depensa, “Ang concrete revetment project sa Barangay Culaman dili usa ka ghost project.
Kini pisikal nga anaa ug naglihok sumala sa gikatuyo niini.”
Dugang pa, gipahayag sa depensa nga walay balaod nga nalapas, ug ang paspas nga pagkahuman sa proyekto usa ka ebidensya sa sakto ug matinud-anon nga pagtuman sa ilang mga kliyente sa ilang mga katungdanan subay sa mandato.
Gibutyag usab sa mga abogado nga ang ilang mga kliyente giingong nahimong “collateral damage” aron ilikay ang atensyon sa publiko gikan sa mas lapad nga isyu sa mga manubag sa kampanya batok sa korapsyon.
Bisan pa niini, gipahayag sa depensa ang ilang pagsalig sa integridad ug pagkamatud-anon sa hudikatura ug miingon nga padayon nilang panalipdan ang katungod sa ilang mga kliyente samtang ginadungog pa ang kaso.
Lakip sa mga ginganlan sa kaso sila Engr. Michael P. Awa, Engr. Joel M. Lumogdang, Engr. Harold John E. Villaver, Engr. Jafel C. Faunillan, Engr. Josephine C. Valdez, Engr. Ranulfo A. Flores, ug Czar Ryan S. Ubungen.
