Nagpahimangno karon ang kapulisan sa lungsod sa Matanao nga magsuot ug helmet kung magmaneho ug motorsiklo ug likayan ang pagmaneho kung nakainom aron malikayan ang disgrasya sa kadalanan.
Kini ang gipagawas nga pahimangno sa hepe sa Matanao MPS tungod sa nahitabong disgrasya sa drayber sa motorsiklo nga miresulta sa kamatayon.
Subay sa report sa kapulisan, napalgan nga wala nay kinabuhi ang usa ka lalaki human kini madisgrasya sa iyahang gimaneho nga motorsiklo pasado alas 4:00 ang takna sa buntag, sa Purok Bird of Paradise, Barangay La Suerte, Matanao, Davao del Sur.
Subay sa report sa kapulisan, giila ang biktima na si Ryan Manonag, 37 anyos, minyo ug residente sa Barangay Bangkal, Matanao, Davao del Sur.
Sa inisyal nga imbestigasyon sa kapulisan, gikan matud pa ang biktima sa Kiblawan, Davao del Sur, nga matud pa nakainom kini ug hubog nga nagmaneho sa iyahang motorsiklo nga usa ka Honda XRM 125.
Pauli na unta sa ilahang panimalay, apan pag abot niini sa liko-on nga bahin sa Barangay La Suerte nadritso matud pa ang biktima sa basakan nga bahin sa maong lugar ug nalagpot kini ug naigo ang ulo sa bato sa tubigan nga bahin sa basakan nga maoy hinungdan sa iyahang hinanali nga kamatayon.
