Gipahimangnoan sa Davao City Police Office ang publiko nga walay kalooy ang kapulisan sa bisan kinsa nga madakpan nga nagagamit o nagabaligya og pabuto sa syudad.
Gipunting ni Acting City Director PCol. Mannan Muarip nga padayon ang pagpatuman sa City Ordinance No. 060-02 aron maprotektahan ang kinabuhi ug kahimsog sa mga Dabawenyo matag Pasko ug Bag-ong Tuig.
Ang mga masakpan mag-atubang og bug-at nga silot, lakip na ang multa nga muabot og ₱5,000 o pagkabilanggo hangtud unom ka bulan, depende sa kadaghan ug kabug-aton sa offense.
Hugot usab gidili ang paggamit sa mga improvised firecrackers sama sa “boga” nga hinimo sa kawayan o PVC ug uban pang pabuto nga nagagamit og lighter fluid.
Giawhag sa DCPO ang tanan nga mogamit na lang og torotot, kaldero, o ubang luwas nga kasikas aron masiguro ang malinawon ug hapsay nga selebrasyon sa Bag-ong Tuig.
